LA FAMILIO EN LA EKLEZIAJ DOKUMENTOJ
Resumo de la prelego de Giovanni Daminelli
La Eklezio montris ĉiam apartan
intereson por la familio, sed en la lastaj jardekoj, fronte
al atakoj kontaŭ la origina konceptado de familio, oni
intensigis la ekleziajn intervenojn pri ĉi tiu temo.
De la pluraj paroladoj al geedzoj fare de papo Pio la
12.a oni atingas la duan Vatikanan Koncilion kie en la dogma
konstitucio "Lumen
Gentium" pri la Eklezio, la familio estas nomita
hejma eklezio kaj en
la dekreto "Apostolicam
Actuositatem" pri la apostolagado de laikoj, estas
precizata la funkcio de la kristana familio, sed estas en la
konstitucio "Gaudium et
Spes", pri la Eklezio en la nuntempa mondo, kie tiu
temo estas detale pritraktata. En ĝia dua parto titolita
"Kelkaj urĝaj problemoj", la unua ĉapitro estas
titolita "Digno de la Geedziĝo kaj de la Familio kaj
ilia valorigo", do la unua urĝa problemo koncernas la
familion.
Sekvas la encikliko "Humane vitae" de papo Paŭlo
la 6.a kiu en 1973 starigis specifan "Komitato por la
Familio" havantan la taskon pristudi la problemojn
tiorilatajn.
Sed estas dum la regado de papo Johano Paŭlo la 2.a
ke la temo estis pli insiste pritraktata. Jam kiel kardinalo,
ĉefepiskopo de Krakovo, li pliprofundigis la temon en la
libro "Amo kaj respondeco", kaj tuj post sia papiĝo li
pritraktis tiun temon en la merkredaj semajnaj
aŭdiencoj.
Estas memorindaj la "Mesaĝo al familioj" de la 6.a
Episkopa Sinodo (1980) kaj la du homilioj okaze de ties
malfermo kaj konkludo fare de papo Johano Paŭlo la
2.a.
En 1981, la papo anstataŭis la "Komitato por la
Familio"-n starigita de Paŭlo la 6.a per "Pontifika
konsilio por la familio" estrata de kardinalo. En la sama
jaro li promulgis la apostolan alvokon "Familiaris Consortio" pri la
taskoj de la kristana familio en la nuntempa mondo.
En la jaro 1994, nomita de Unuiĝintaj Nacioj
"Internacia jaro de la Familio", li verkis kaj disdonigis
"Leteron al la
Familioj"; temas pri longa letero en kiu li klare
prezentas al la familioj la penson, la prizorgojn kaj la
esperojn de la Eklezio rilate al ĉi tiu institucio. La
letero komencas montrante kiel jam de la komenco, la Kreinto
enigis la homon en familion: en la unua ĉapitro de la
Genezo oni legas (1,27): "Dio kreis la homon laŭ Sia bildo,
laŭ la bildo de Dio Li kreis lin; en formo de viro kaj
de virino Li kreis ilin"; je la lumo de Nova
Testamento do, la duopo viro-virino unuigitaj de la amo estas
bildo de Dio triunua, kie la Patro kaj la Filo estas
unuigitaj de la Sankta Spirito. Pro tio, en Genezo (2,4) oni
legas: "Tial viro forlasos
sian patron kaj patrinon, kaj aliĝos al sia edzino, kaj
ili estos unu karno" kaj pro tio la geedziĝo
estas deklarata nedisigebla. La letero pludaŭras
parolante pri la malfermo al la vivo, la filoj, la sociaj
interligoj kaj la danĝeroj kiuj nuntempe minacas ĉi
tiun institucion.
